الرادود: باسم الكربلائي 📜قصيدة : عنك اذا سألوني ✒للشاعر : علي السقاي 🔖المناسبة : مولد الامام الحسن ع عنك إذا سئلوني تفضحني بيك عيوني يا المجتبي وبحبك مفتونك يسموني هالحب ساكن أجفاني يالمجتبي وبحبك مفتونك يسموني يا نور العين عنك إذا سألوني .. 🌸🌸🌸🌸🌸 إنت الحسن وبذاتك كل الحسن يتجمع من أصلك اللاهوتي معنى القدس يتفرع خيوط الشمس من وجهك عالدنية تزهي وتسطع سيد شباب الجنة والجنة دونك بلقع لاون گلت ما أبالغ بيك الرسل تتولع موسى ابعصى ثعبانه إلساحر جمالك يخضع داوود تكسر درعه ابشوگك لون يتدرع أيوب لو يتصبر صبره ابمحبتك يجزع سبحانه رب القدرة يا قدرة قادر يا الحسن صاغك أمره بالحسن الزاهر حسنك أجل من فكرة ينظمها الشاعر يامن ابأول نظرة يهواك الناظر يالجمالك .. من كمالك مرهونة روحي ابكيفك وأرخصها حتى إلشوفة طيفك يالبيك اجنوني 🌸🌸🌸🌸🌸 للهادي يا ريحانة بضلوعي شوگك يكبر ما أملك أكبر منه بس چلمة الله أكبر كل سائل إليسألني عنك يا ضنوة حيدر بعيوني يلگة اجوابي ابحبك او ما يتغير حبك أحضنه ابجفني جفني اويا حبك يسهر دجلة او فرات آمالي تروي لي حلمي الأخضر وعيوني كل ما ترمش كل ما محبتك تكثر عاد إحسب اشچم مرة والناتج اشيتقرر وإحسب ابعالم صدري چم نبضة ابگلبي كل نبضة لاون تدري اتعبر عن حبي دمي ابمحبتك يجري او خل يشهد ربي فدوة إلك كل عمري يا راسم دربي عمري فدوة .. للي أهوى ابعمري إشتريت اوصالك بس لحظة تصفالي او أدنالك لا تخيب اظنوني 🌸🌸🌸🌸🌸 حگه البدر بوجودك ما يظهر إلا خلافك حين إلي تسهر حگه هالليل لو ما عافك بدر او شمس واتلاگن و صار الوجه مضيافك من وجهك او أنواره اتغار الشمس وتخافك هالعالم ابكل حسنه إلهامه من ألطافك للحسن تفصيلاته والمختصر بشفافك حتى إلي ما يتغزل يتغزل ابأوصافك الأخرس تنطق السانه يالمجتبى لو شافك كل الذي يتأمل بعض امن آياتك ابلا رادة لن يتغزل ويوصف ذاتك ايحير اشيوصفه الأول يبدي ابقسماتك لو يلي جفنك أكحل يبدي ابنظراتك ابهالمحاسن .. والمفاتن حاير شگولن عنك وأسهر ليالي و أشكي لحسنك ذوبت اجفوني 🌸🌸🌸🌸🌸 معجم مضامين الحب ما يفتهم مضمونك كل المعاني إحتارت يا سيدي بعيونك أهمس لون أنظرهن هونك عليه هونك سهم الرمش لو تدري صوب گلب مفتونك وبهالعشگ لو گالوا قيسك أنا و مجنونك سبعين قيس ابمثلي ما گدروا ايعشگونك عاشگ أنا و هالوادم يدروني رهن اجفونك خاف أحچي عنك وأحچي ايحسدوني ويحسدونك خل كل حسود او لايم يتركني ابحالي مهما يريد ايساوم ما أبيع الغالي آنه ابإمامي هايم وأكتب آمالي گلبي اعلى كل حب صايم هالحب اهلالي يا إمامي .. يا هيامي أقسم ابإسمك أقسم ماعوفك او عذالي ما يهم خلي يلوموني 🌸🌸🌸🌸🌸 #اللهم_عجل_لوليك_الفرج جميع الحقوق محفوظة © (أثر) https://www.youtube.com/@thura.M313